سبه‌ی ده‌مریت ..

سبه‌ی ده‌مریت و .. من و برینێك جێ‌دێڵیت

دوای خۆت .. دیوه‌خانه‌یه‌كی رووخاو ..

شاخێكی بن كۆڵا و باخێكی سووتاو ..

به‌جێدێڵیت .. !

هۆ باوكه‌ گیان ..

تۆ ده‌مریت و .. من ده‌مێنم

تۆ میراتی گه‌وره‌ی خه‌م و برسیه‌تی و ..

داڕووخانیت بۆ من .. !

دوای خۆت ..

چی له‌ خه‌نجه‌رێكی ژه‌نگدار و شكاو بكه‌م ..؟

چی له‌ ده‌م و چاوێكی سووتاو بكه‌م ..؟

ئه‌ی رووباری وشكه‌وه‌بوو ..

ئه‌ی هێلانه‌ی قه‌له‌ڕه‌ش و كونه‌په‌پوو ..!

*

تۆ ده‌مریت و منی چۆله‌كه‌ ..

بۆ ئاسمانێكی پڕ له‌ واشه‌ جێدێڵیت

تووله‌ ماسیم و ..

بۆ ده‌ریایه‌كی پڕ له‌ نه‌هه‌نگ .. به‌جێم دێڵیت !

*

سبه‌ی كه‌ ده‌مریت ..

دوژمنه‌كانت به‌ دوامدا ده‌گه‌ڕێن

كون به‌ كون

وه‌ك ئاسكێكی شه‌ل و كوێر .. راوم ده‌نێن

ده‌مگرن .. ده‌مكوژن .. ده‌مگروێنن ..!

*

ئاه .. باوكه‌ ..

تۆ چی جێ‌دێڵی ..؟

ئاسمانێكی بێ‌ خۆر و مانگ و ئه‌ستێره‌

زستانێكی بێ‌ باران

مردوویه‌كی بێ‌ كێل و ناوونیشان

جیهانێك پڕ له‌ گرێ‌ و گریان و گومان ..!

*

تۆ ده‌مریت و ..

جگه‌ له‌ – ناوزڕان – میراتگری هیچ شتێك نیم

جگه‌ له‌ قوتیله‌ و هه‌گبه‌ی سواڵكه‌ر ..

جگه‌ له‌ كڵاوی كه‌چه‌ڵا ..

میراتگری چیم ..

*

سبه‌ی ده‌مریت ..

نه‌ پاره‌ی كفن و جاو ..

نه‌ نرخی كێلێكی شكاو

من جگه‌ له‌ لاشه‌ی داڕزیوی تۆ ..

جگه‌ له‌ خه‌می هه‌ره‌ گه‌وره‌م ..

هیچ شك نابه‌م ..!