ئه‌ی په‌یكه‌ری نه‌گبه‌تی .. من تۆ ماچ ده‌كه‌م

یان .. لێوم خستۆته‌ سه‌ر لێوی ..

شۆخی خه‌م و مه‌ینه‌تی ..؟

ئه‌وه‌ تۆیت .. كه‌ ده‌تگرمه‌ ئامێزم

یان .. گه‌رده‌لوولی غوربه‌تی …؟

ئه‌وه‌ تۆیت .. یان تاڤگه‌ی به‌ خوڕه‌می خه‌م و خوێنیت …؟

كه‌ ده‌ست به‌ نێو قژتا دێنم ..

وا هه‌ست ده‌كه‌م ..ئاسكێكی چوار په‌ل سووتاوم ..

له‌ نێو دارستانێكی گڕگرتوودا ..

په‌ل ده‌هاوم ..!

ئه‌مه‌ سه‌ر و پرچی تۆیه‌..

یا ره‌زێكی قه‌ره‌برووته‌ ..؟

ئه‌وه‌ سینه‌ و مه‌مكی تۆیه‌ ..

یا خاكێكی وشك و رووته‌؟

*

نا .. من كه‌ تۆ ماچ ده‌كه‌م ..

خه‌مێكی پیر و .. پیرۆز ماچ ده‌كه‌م ..!

*

من له‌ مێژه‌ چاوه‌ڕوانی ئازارێكی كه‌ڵه‌گه‌تم ..

تا گه‌ر هات و له‌ كونجی غوربه‌تیما ..

له‌ ته‌نیایی .. توامه‌وه‌

تۆ بێیت و به‌سه‌رما بچه‌مێیته‌وه‌ ..

بمگریته‌ باوه‌ش و .. بملاوێنیته‌وه‌!

*

ئه‌ی په‌یكه‌ری مه‌ینه‌تی ..

ئه‌ی چیرۆكی بێ‌كۆتایی نسكۆ و .. نه‌گبه‌تی

من و تۆ .. دڵدار و دڵخواز نین ..

ئه‌من و تۆ ..

دوو رووباری فرمێسكی سه‌رهه‌ڵگرتوو بووین ..

له‌ شه‌تاوێكا تێكه‌ڵا بووین!

*

ده‌ بێنه‌ .. با ئه‌و چاوانه‌ت تێر ماچ كه‌م

ئاخ … ئه‌وه‌ هه‌ردوو چاوانی تۆن

یا دوو كوێره‌كانی بنارێكن..؟

ده‌ ئه‌و گه‌ردنه‌ زه‌رده‌ت هه‌ڵبڕه‌ ..

ئاخ.. ئه‌وه‌ گه‌ردنی ئه‌وسای تۆیه‌ ..

یا كێلی شكاوی مه‌زارێكه‌ …؟

*

تۆ بۆ من چی نه‌بوویت ..؟

تۆ بارانێكی ره‌حمه‌ت بوویت..

منیش خاكێكی تینوو

تۆ عیسای موعجیزه‌ بوویت ..

منیش عاشقێكی بێ‌مراد و مردوو ..!

*

ده‌وه‌ره‌ ئه‌ی كچی ده‌رد و مه‌ینه‌ت ..

بمگره‌ ئامێز و تێر ماچم كه‌

تۆ من ماچ ده‌كه‌ی ..

یان ..هه‌یكه‌لی عومرێكی پڕ حه‌سره‌ت …؟!

سلێمانی – 18/8/1984