هۆ پیره‌ژنه‌ برژاوه‌كان.. هۆ دیله‌ پشت كۆماوه‌كان.

ئه‌ی ئه‌وانه‌ی له‌ گریان زیاتر ..

زمانێكیتر …. نازانن..

له‌مه‌ودوا.. گه‌ر سینه‌ی رووت و مه‌مكی وشكه‌وه‌بووتان..

بۆ بۆشایی ئاسمانێكی لێڵا و تاریك ده‌كه‌نه‌وه‌..

كه‌ هاوار ده‌كه‌ن.. ده‌پاڕێنه‌وه‌..

داوابكه‌ن..

هه‌ر چوار وه‌رزی ئه‌مساڵا هه‌ر زستان بێ‌

هه‌ر بروسكه‌ و لێزمه‌ی به‌خوڕی باران بێ‌

تكا بكه‌ن..

به‌قه‌د ئاهو نوزه‌ و نزا و ناڵه‌ و گریه‌ی نیوه‌شه‌وتان..

ئاسمان وه‌ك هه‌تیوێـكی دڵا سارد و به‌جێماو

جێماوی ناو شارێـكی پڕ كه‌لاوه‌ی رووخاو

به‌خوڕ به‌سه‌رتانا بگری

تكا بكه‌ن..

پێغه‌مبه‌رێك له‌خه‌و رابێ‌و.. ده‌ست به‌م بانه‌ ته‌پیوه‌دا بگرێ‌

هه‌رچه‌نده‌ ئێوه‌ هانا بۆ ئاسمان ده‌به‌ن..

پتر و پتر..

چۆله‌كه‌ی مردوو سه‌ر شه‌قامه‌كان پڕ ده‌كه‌ن..!

ئه‌ی ئه‌وانه‌ی..

شه‌وانه‌ خه‌ون به‌ گۆڕ و سێداره‌وه‌ ده‌بینن..

تكا بكه‌ن.. هه‌ر چوار وه‌رزه‌كه‌ زستان بێ‌

با به‌فر و باران و زریان بێ‌

تا ده‌روونی وشكتان بشواته‌وه‌

زه‌وی تینووش ئاو بخواته‌وه‌

ئه‌مساڵا تۆز و خۆڵی گوناه‌..

سه‌ربان و شه‌قام و كۆڵان و دارستانه‌كانیشی..

گرتۆته‌وه‌

تكا بكه‌ن هه‌ر باران بێ‌ و ..

قه‌تیش وشكی نه‌كاته‌وه‌

گوناهی سه‌ر قه‌ڵا و گومه‌ز و خاچ و كۆندڕه‌كان ..

چی ده‌یشواته‌وه‌..؟

ئاخر ره‌نگی خوێنی رژاوی مناڵێك ..

بارانی هه‌زار ساڵیش نایباته‌وه‌ ..!

تانه‌ی سه‌رچاو و ژه‌نگی ددان ..

چی ده‌یشواته‌وه‌؟

1982